नेपाल चलचित्र प्राविधिक संघले आयोजना गर्दै आएको नेफ्टा फिल्म अवार्ड यो पटक पनि अन्तराष्ट्रिय स्तरमा नै आयोजना हुने भएको छ । यो पटकको नवौं अन्तराष्ट्रिय नेफ्टा फिल्म अवार्ड आगामी कात्तिक २५ (नोभेम्बर १०) तारिखका दिन हुने नेफ्टा अध्यक्ष पुष्कर लामाले जानकारी दिएका छन ।
अवार्ड आयोजना स्थलको घोषणा भने उत्कृष्ट पाँच मनोनयन सार्वजनिक गर्ने अवसरमा सार्बजनिक गर्ने बताईएको छ । जुरीहरुले यसै साता देखि मूल्यांकनका लागि फिल्म हेर्न सुरु गर्ने पनि बताईएको छ । २०७२ बैशाख १ गतेदेखि चैत मसान्तभित्र प्रदर्शनमा आएका सिनेमालाई अवार्डमा सहभागि गराइने भएको छ । यसका लागि निर्माताले साउन २१ गतेभित्र आफ्नो फिल्म नेफ्टाको बागबजारस्थित कार्यालयमा बुझाइसक्नुपर्ने छ ।
यसअघि मलेसिया, हङकङ र कतारमा अवार्ड गरिसकेको नेफ्टाले यसपटक पनि विदेशमा अवार्ड गर्ने सिलसिलालाई निरन्तरता दिनेभएको छ । नवौं संस्करणमा नेफ्टाले अवार्डको नाममा अन्तराष्ट्रिय शब्द थपेको छ । ‘यस अवार्डलाई हामीले नेपाली सिनेमाको अन्तराष्ट्रियकरणमा आयाम थप्ने अवसरको रुपमा लिँदैछौं’ अध्यक्ष लामाले भने ।
यसपटक सयभन्दा बढी नेपाली कलाकार, प्राविधिक, फिल्म निर्माता, पत्रकार लगायत अवार्डमा सहभागि हुने नेफ्टाले जानकारी दियो ।