नायिका झरना थापा अहिले आफुले अभिनय गरेको सफल चलचित्र 'ए मेरा हजुर'को सिक्वेल बनाउने तयारीमा छिन् । केहि दिन अघि मात्र साम्राज्ञीराज्य लक्ष्मी शाहलाई नायिकाको रुपमा पक्का गरेकी झरनाले साउन २० गतेबाट चलचित्र 'ए मेरो हजुर २' को छायाँकन आरम्भ गर्ने तयारीमा रहेकी छिन् । पहिलो पटक निर्देशनमा उत्रिन लागेकी झरनाले यस अघि नाजिर हुसेन र वुद्धी तामाङ चलचित्रका लागि फाइनल गरिसकेकी थिइन । सुनिल थापा कार्यकारी निर्माता भएर तयार हुन लागेको यो चलचित्रको निर्मात्री भने झरना थापाकी २० बर्षकी छोरी सुवानी थापा रहने छिन् । यो चलचित्रको औपचारिक निर्माण घोषणा २०७१ कार्तिक ३ गते हङकङमा आयोजना भएको ‘सातौ नेफ्टा फिल्म अवार्ड’मा गरिएको थियो । यो चलचित्रको औपचारिक निर्माण घोषणा पनि झरनाकी छोरी सुवानीले नै गरेकी थिइन भने सोहि कार्यक्रममा सुनिल थापाले आफ्नी छोरी सुवानी थापा 'ए मेरो हजुर २' को निर्मात्री रहने पनि खुलाएका थिए । आफ्नो बुबा निर्माता र आमा अभिनेत्री भएपनि सुवानीलाई भने अभिनयको कुनै पनि सोख छैन् । उनी कलाकारितामा होइन एक सक्षम पाइलट बन्न चाहन्छिन् । यो कुरा स्वयम झरनाले बताएकी हुन् । केहि बर्ष अगाडी एक अन्तर्वार्तामा झरनाले आफ्नो छोरी नायिका नभएर पाइलट बन्ने इच्छा बोकेकी बताएकी थिइन । अभिनेत्री झरना थापा आफ्नो समयकी सफल अभिनेत्री हुन् । लगभग एक सय नजिक नेपाली फिल्मकी अभिनेत्री थापाले दर्जन बढी हिट फिल्म दिएकी छिन् । अभिनयपछि अब झरना फिल्म निर्देशनमा जुटेकी छिन् । निकै बर्ष अगाडी श्रीकृष्ण श्रेष्ठ र झरना थापालाई लिएर शिव रेग्मीले  ‘ए मेरो हजुर’  निर्देशन गरेका थिए । यो चलचितत्र एकसमयको सर्वाधिक सफल चलचित्रको रुपमा हेरिन्छ ।