वरिष्ठ संगीतकार एवं राष्ट्रिय गीतका संगीतकार अम्बर गुरुङको स्वास्थ्यस्थिति गम्भीर रहेको चिकित्सकले जनाएका छन् । उनको उपचार भइरहेको ग्रान्डी अन्तर्राष्ट्रिय अस्पतालले सोमबार पत्रकारसम्मेलन गरी उनको स्वास्थ्यस्थितिबारे जानकारी दिएको हो । पत्रकार सम्मेलनमा उपचारमा संलग्न डा.चक्रराज पाण्डेले संगीतकार गुरुङको स्वास्थ्य अबस्था नाजुक रहेको बताएका छन् । 

उनले गुरुङको रक्तस्रावका कारण फोक्सोमा रगत गएकाले उनको श्वासप्रश्वासमा जटिल समस्या आएको जानकारी दिँदै कति मिनेट वा घन्टामा के हुन्छ भन्ने स्थिति नभएको जानकारी दिए । उनका जेठा र माइला सुपुत्र किशोर र राजु गुरुङले सोमबार केही सन्चारमाध्यममा निधन भएको भन्ने समाचारमा आएको कुरा निराधार भएको बताउँदै सन्चारमाध्यलाई संयमित भएर काम गर्न आग्रह गरे । खानेनलीमा समस्या, श्वासप्रश्वासमा जटिलता, मधुमेह, पार्किसन्स तथा उच्च रक्तचापलगायत समस्याले ग्रसित गुरुङ एक सातादेखि ग्रान्डी अस्पतालमा उपचाररत् छन् ।