चलचित्र 'ड्रिम्स'मा काम गरेपछि सर्वाधिक चर्चामा आएकी अभिनेत्री साम्राज्ञीराज्य लक्ष्मी शाह अभिनेत्री झरना थापाले निर्देशन गर्न लागेको चलचित्र 'ए मेरो हजुर २' का लागि फाइनल भएकी छिन् । शुक्रबार झरना र साम्राज्ञीले सम्झौता पत्रमा हस्ताक्षर समेत गरेका छन् । साम्राज्ञीले यो चलचित्रका लागि ५ लाख पारिश्रमिक मागेको बताइएको छ । आधिकारीक रुपमा चलचित्रका निर्माता सुनिल कुमार थापाले साम्राज्ञीले कति पारिश्रमिकमा चलचित्र खेल्न राजी भइन भन्ने कुरा नखुलाएपनि साम्राज्ञीले ५ लाखकै आसपासमा पारिश्रमिक लिएर चलचित्र खेल्न राजी भएको बुझिएको छ । नाजिर हुसेन र वुद्धी तामाङ यस अघि नै चलचित्रको कलाकारमा फाइनल भइसकेका थिए भने नायिकामा साम्रज्ञी फाइनल भएसँगै अब यो चलचित्रको छायाँकन साउन २० गतेबाट सुरु हुने अभिनेत्री झरना थापाले जानकारी दिइन । पहिलो पटक निर्देशनमा उत्रिन लागेकी झरनाले चलचित्रको कथामा साम्राज्ञी सुहाउने भएका कारण उनलाई लिएको जानकारी दिइन । साम्रज्ञीले 'ए मेरो हजुर २' रिलिज नुहँदासम्म अरु कुनै पनि चलचित्रमा काम नगर्ने सम्झौतासम्म भएको छ । निकै बर्ष अगाडी श्रीकृष्ण श्रेष्ठ र झरना थापालाई लिएर शिव रेग्मीले  ‘ए मेरो हजुर’  निर्देशन गरेका थिए । यो चलचितत्र एकसमयको सर्वाधिक सफल चलचित्रको रुपमा हेरिन्छ । निर्माता थापाका अनुसार यो चलचित्रले अहिलेका युवापुस्ताको कथा बोल्नेछ ।